Starað út í geiminn

Í 5000 metra hæð yfir sjávarmáli, hátt á Chajnantor hásléttunni í Chile, stara loftnet ALMA stjörnustöðvarinnar út í alheiminn í leit að vísbendingum um uppruna okkar í alheiminum. Sléttan er einn hæsti stjörnuskoðunarstaður á Jörðinni.

Innan um stjörnuskarann á myndinni sjást Litla og Stóra Magellansskýið hægra megin sem bjartir ljósblettir á himninum. Bæði skýin eru vetrarbrautir — tveir af næstu nágrönnum okkar Vetrarbrautar.

Meginmarkmið ALMA er að rannsaka köldustu og elstu fyrirbærin í alheiminum — hinn kalda alheim sem svo er kallaður. Sjónaukaröðin mælir geislun með millímetra og hálfsmillímetra bylgjulengdir, milli innrauðs ljóss og útvarpsbylgna á rafsegulrófinu. Röðin samanstendur af 66 loftnetum sem hægt er að færa til til þess að mæta þörfum og kröfum vísindamanna og er því stærsta stjarnvísindaverkefni heims.

Þessa glæsilegu mynd af landslaginu í kringum ALMA tók Stéphane Guisard, einn af ljósmyndurum ESO, en hann vinnur sem sjóntækjafræðingur við Very Large Telescope Stjörnustöðvar Evrópulanda á suðurhveli í Atacamaeyðimörkinni í Chile.